Ko e fuofua polokalama noo fo’ou kuo fakahoko ‘e he Pangike Langa Fakalakalaka ‘o Tonga ‘oku ui ko e Micro Lending pe ko e Noo ke tokoni’i ‘aki nautolu ’oku ’ikai ai ha’a nau koloa fe’unga ke malu’i ’aki ’enau noo. Ko e polokalama no ko eni, ‘oku fakataumu’a ki he kakai ‘oku fiema’u ke fakalele fakatautaha pe fakakulupu ‘enau ngaahi ngaue kehekehe ’i he mala’e fakapisinisi  hange ko e  ngoue, toutai, ngaue fakamea’a, ngaohi koloa, fefakatau’aki pe ko ha ngaahi pisinisi iiki kehe pe. 

’Oku makehe ’a e tokoni ’a e polokalama noo ke faka’ai’ai ’a e fakalakalaka ko e ‘uhi ‘oku tokoni’i kinautolu koia ‘oku ‘ikai lelei ‘enau tu’unga fakakoloamalu’i ke nau malava ’o ma’u ha faingamalie noo mei he Pangike.   

‘Oku makehe foki ’a e polokalama no ko ’eni he ‘oku fiema’u  ke kau mai ‘a e tokotaha kole no ‘i he ngaahi ako kuo fokotu’utu’u ‘e he Pangike ke tokoni’i mo fakahinohino fakalelei ‘a e founga ki hono ngaue’aki ‘a e pa’anga noo fakatatau ki he ngaahi mala’e kehekehe ‘o e  fakalele pisinisi moe tauhi lekooti.  Ko e ako ko’eni ’oku ’ikai totongi.  Ko e lahi ’oe no ’oku tukuatu ki he tokotaha no ko e pa’anga ‘e $2,000.00     

Kuo ‘osi lava foki ‘a e polokalama ako ‘e 3 ‘i Ma’asi ni ‘o kamata mei he Vahehihifo pea ‘e hokohoko atu ai pe ‘a e ngaahi ako ko ’eni pea mo fili mei ai ‘a e fa’ahinga ke nau kau mai ki he polokalama noo faka’ai’ai ‘o e fakalakalaka ‘i Tongatapu ni.   

Ko e ‘aho ni kuo tali ha no ‘e 11 pea ‘oku lolotonga hoko atu ’a e ngaue koia ki he ngaahi noo ‘oku malava ke nau ma’u faingamalie mei he polokalama noo ko'eni. ‘Oku tokoni lahi foki ‘a hono fakahoko ‘a e polokalama noo ko 'eni ke a’usia ‘a e taumu’a ngaue ‘a e Pangike Langa Fakalakalaka ‘o Tonga ki hono langa’i hake ‘a e mo’ui faka’ekonomika pea moe fakasosiale ’o e kakai Tonga.